أحلى بطوط ...... Ahla Batoot

منتدي ثقافي تعليمي
 
الرئيسيةالرئيسية  التسجيلالتسجيل  دخولدخول  

شاطر | 
 

 لقاء مع السيد المسئول

اذهب الى الأسفل 
كاتب الموضوعرسالة
Adel
عضو جديد


المساهمات : 90
تاريخ التسجيل : 04/08/2008
العمر : 57

مُساهمةموضوع: لقاء مع السيد المسئول   الثلاثاء أغسطس 12, 2008 11:06 am

المذيعة: عودة للمسئول العظيم اللي يقدر يعمل كل حاجة في البلد وهو قاعد على كرسيه هنا معانا.. عشان بس عايزين نعرّف الناس ان الحكومة دي مظلومة وانهم مفتريين وبيستهبلوا.. نرجع ونكلم حضرتك عن موضوع شاغل الرأي العام فترة طويلة خالص وهو موضوع العبارة الى غرقت
المسؤول: غرقت ايه وهو انتي بتصدقي الكلام ده؟
المذيعة: همّ بيقولوا كده
المسؤول: هفهمك انا الموضوع كله، حضرتك عارفة فيلم تايتانك؟
المذيعة: اه ليوناردو دي كابريو كان اموور اوي في الفيلم بصراحة
المسؤول: اهو الموضوع كله ان ممدوح سليمان
المذيعة: ممدوح اسماعيل يافندم
المسؤول: اه معلش.. حضرتك الفيلم ده كسر الدنيا وجاب عائد مادي ضخم جداااا فممدوح اسماعيل حب يعمل فيلم مصري خاص عشان يجيب عائد مادي لمصر.. فخرّب العبارة بتاعته.. الراجل الحق عليه عشان اما تغرق يصورها ونعمل فيلم مصري عالمي.. بس ده كل الموضوع
المذيعة: طب يافندم في ناس بيقولوا ان في ناس ماتت بجد
المسؤول: ياستّي الاعمار بيد الله
المذيعة: بس المفروض ان ممدوح اسماعيل يعوّضهم
المسؤول: وهو في بعد تعويض ربنا؟
المذيعة: طب هو فين الفيلم ده يافندم؟
المسؤول: للأسف الشديد المصور وهو بيصور الفيلم غرق.. فبالتالى مفيش فيلم من اصله
المذيعة: يعني ممدوح اسماعيل كان عايز يعمل فيلم عالمي زي تايتانك
المسؤول: زي ما بقولك كده
المذيعة: وبالتالى اعزائي المشاهديين احنا كده عرفنا قد ايه احنا ظلمنا الراجل
نعود بعد الفاصل في برنامجنا حوار مع السيد المسؤول
*******
:: فاصل :::
*******
المذيعة: احنا ممكن نستقبل اتصالات دلوقتي.. يافندم حضرتك مستعد تفتح صدرك للمواطنين وتسمعهم
المسؤول: طبعا طبعا انا تحت امر المواطنين
المذيعة: نقول الو
المواطن: الو سلامو عليكم
المذيعة: وعليكم السلام اتفضل يااستاذ
المواطن: انا بس كنت عايز اقول للسيد المسؤول ان انا ابني في المعتقل بقاله 12 سنة ومعرفش عنه حاجة انا بس عايز اعرف هيخــ
......
المذيعة: ألو ألو.. واضح ان الخط اتقطع
المسؤول: فعلا واضح ان الخط اتقطع.. حضرتك شديدة الملاحظة
المذيعة بكسوف شديد: ميرسي جدا يا فندم ده بس من ذوقك.. بس هو كان بيسأل عن ابنه اللي في المعتقل بقاله 12 سنة
المسؤول: هو كان بيقول معتقل ولا اتنقل؟
المذيعة: لا انا سمعتها معتقل
المسؤول: وانا سمعتها اتنقل.. هو انتو هتسمعوا احسن من الحكومة؟
المذيعة بوش اصفر وخلاص هيغمى عليها: لا يافندم وهيّ دي تيجي؟ هو فعلا قال اتنقل.. اتنقل من شغله لشغل تاني وبعد ما حالة اتظبط ساب العيلة اللي كان عايش فيها
المسؤول: اه انا سمعت كدة برده
المذيعة: فاصل مع الاعلان ونعود ليكم على طول
*******
::: فاصل :::
*******
المذيعة: بعد الفاصل عدنا اليكم من جديد ومعانا ضيفنا المسؤول المهم في الحكومة المظلومة وبنسأله ونقوله ايه رأي حضرتك في الكليبات اللي بتتعرض على القنوات الفضائية المصرية اليومين دول؟
المسؤول: والله حاجة جميلة ونقلة في ثقافة البلد وثقافة ابناء وبنات البلد
المذيعة: بس في اعتراضات من بعض المشاهدين على ملابس بعض الفنانات وعلى راسهم الفنانة هيفاء.. بالذات بعد اغنية بوس الواوا
المسؤول: انا مش شايف اي حاجة في كليب الاغنية دي.. وبعدين دي بتغني لابنها الصغير يعني ده عيل صغير اولا.. وبعدين الناس حرة في بيوتها تعمل اللي هيا عايزاه
المذيعة: طب والمغنية التانية اللي فضلت تخلع في هدومها من اول الكليب لاخره
المسؤول: على فكرة دي من اجمل الكليبات اللي اتعملت.. مش دي الاغنية اللي بتقول
ليه تجرحني وليه تخدعني
ليه يا حبيبي بتسطلطخني
لية يا اناني يا كذاب
هو انا راكنة الفيل على الباب
المذيعة بفرحة شديدة: الله ده حضرتك حافظ الاغنية كلها
المسؤول: طبعا دي اغنية جميلة اوي
المذيعة: ايوة بس دي على اخر الاغنية كانت خلعت كل هدومها
المسؤول: واضح ان حضرتك ما سمعتيش الاغنية كويس لانها في اخر الاغنية قالتله
وادي هدومك مش عيزاها
عليّ النعمة منا لبساها
يعني الكليب بيحكي واقع كلمات الاغنية.. انا مش عارف معترضين على ايه
المذيعة: والله يافندم انا مش عارفة اقول ايه.. حضرتك وضحت كل الامور بكل بساطة وهدوء
المسؤول: ده واجبنا تجاه وطنا
المذيعة: السادة المشاهدين في نهاية الحلقة بنحب نوجه الشكر لكل رجال الدولة القائمين على حماية البلد والساهرين على امنها.. والى اللقاء في حلقة جديدة من برنامجكم المفضل لقاء مع السيد المسؤول

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
zifagoo
عضو جديد
avatar

المساهمات : 98
تاريخ التسجيل : 05/08/2008
العمر : 39

مُساهمةموضوع: رد: لقاء مع السيد المسئول   الثلاثاء أغسطس 12, 2008 2:07 pm

شكررررررا للسيد المسئول قصدي استاذ عادل
علي الحوار قصدي الموضوع

و نعود بعد الفاصل

_________________
عجبتني كلمة من كلام الورق
النور شرق بين حروفها و برق
حبيت اشيلها في قلبي قالت حرام
ده انا كل قلب دخلت فيه اتحرق
عجبي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
لقاء مع السيد المسئول
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
أحلى بطوط ...... Ahla Batoot :: أحلى المنتديات :: المنتدى العام-
انتقل الى: